Refuzimi i Komisionit Europian për të krijuar një llogari zyrtare në TikTok po shkakton debate brenda institucionit, ku disa zyrtarë argumentojnë se Brukseli po bën një gabim strategjik duke qëndruar larg një platforme që përdoret nga rreth 200 milionë europianë.
Çështja nëse ekzekutivi i BE-së duhet të krijojë një prani zyrtare në platformën në pronësi kineze është diskutuar edhe në takime të nivelit të lartë. Sipas zyrtarëve të cituar në kushte anonimiteti, të paktën një komisioner ka kërkuar që qëndrimi aktual të rishikohet.
Komisioni Europian e ndaloi TikTok-un në pajisjet e stafit në vitin 2023 për shkak të shqetësimeve të sigurisë kibernetike. Ndalimi përfshin gjithashtu pajisjet personale të regjistruara në shërbimin e pajisjeve celulare të Komisionit.
“Ne ndjekim zhvillimin e platformës, në veçanti situatën lidhur me mbrojtjen e të dhënave dhe shqetësimet për sigurinë kibernetike”, ka deklaruar Komisioni.
Megjithatë, aktualisht ka pak sinjale se politika mund të ndryshojë. Dana Spinant, drejtoresha e përgjithshme për Komunikimin në Komisionin Europian, kundërshton krijimin e një llogarie zyrtare në TikTok, sipas një zyrtari të njohur me diskutimet e brendshme.
Nga ana tjetër, në kabinetet e disa komisionerëve ka pakënaqësi për faktin se Brukseli mungon në një platformë ku gjithnjë e më shumë të rinj europianë informohen dhe krijojnë pikëpamjet e tyre për zhvillimet politike dhe shoqërore.
Një prej zyrtarëve argumentoi se Rusia nuk ka të njëjtat rezerva për përdorimin e rrjeteve sociale për të ndikuar opinionin publik europian dhe se Komisioni nuk mund t’ua lërë këtë hapësirë aktorëve të tjerë.
Debati zhvillohet në një kohë kur presidentja e Komisionit Europian, Ursula von der Leyen, dhe ekipi i saj po përpiqen të arrijnë një audiencë më të gjerë përmes rrjeteve sociale.
Von der Leyen pritet të ftojë këtë muaj në fjalimin e saj për Gjendjen e Bashkimit edhe influencerë, mes tyre persona që publikojnë përmbajtje në TikTok. Kjo ka nxitur kritika brenda institucionit, pasi Komisioni synon të përçojë mesazhet e tij përmes influencerëve në një platformë ku vetë refuzon të krijojë një llogari.
Në vend të TikTok-ut, Komisioni Europian po orienton gjithnjë e më shumë komunikimin drejt YouTube, ku llogaria e tij numëron mbi 500 mijë abonentë.
