Çmimi i naftës në tregjet ndërkombëtare është rritur sërish, duke kaluar nivelin e 91 dollarëve për fuçi dhe duke arritur vlerën më të lartë që nga fundi i korrikut.
Nafta Brent, e cila shërben si referencë kryesore për tregun global, u tregtua rreth 91 dollarë për fuçi, ndërsa nafta amerikane WTI u ngjit pranë nivelit të 85 dollarëve.
Rritja e çmimeve vjen në një moment tensionesh të shtuara mes Shteteve të Bashkuara dhe Iranit, ndërsa po zbehen shpresat për një marrëveshje të shpejtë që do të mundësonte rihapjen e Ngushticës së Hormuzit, një prej korridoreve më të rëndësishme në botë për transportin e naftës.
Pasiguria u shtua më tej pasi Huthit në Jemen, të mbështetur nga Irani, pretenduan se kishin shënjestruar një rafineri të Saudi Aramco-s në jugperëndim të Arabisë Saudite. CNN bëri të ditur se nuk kishte mundur ta verifikonte në mënyrë të pavarur pretendimin, ndërsa autoritetet saudite nuk kishin reaguar.
Në të njëjtën kohë, tregjet reaguan edhe ndaj raportimeve se një anije ishte goditur nga një “predhë e panjohur” në Ngushticën e Hormuzit, duke shtuar shqetësimet për sigurinë e transportit detar në rajon.
Irani ka deklaruar se ngushtica do të vazhdojë të mbetet e mbyllur dhe ka vendosur disa kushte për rihapjen e saj. Mes kërkesave të Teheranit janë heqja e sanksioneve amerikane ndaj sektorit iranian të naftës, si dhe përfundimi i kërcënimeve dhe operacioneve ushtarake.
Ngushtica e Hormuzit ka një rëndësi strategjike për tregjet globale të energjisë, pasi përmes saj kalon një pjesë e konsiderueshme e eksporteve të naftës nga vendet e Gjirit drejt tregjeve ndërkombëtare. Çdo pengesë në transportin përmes kësaj rruge rrit shqetësimet për furnizimin dhe ushtron presion mbi çmimet.
Tregjet po reagojnë tashmë ndaj pasigurisë së krijuar në Lindjen e Mesme. Analistët paralajmërojnë se çmimet e naftës mund të qëndrojnë në nivele të larta nëse Ngushtica e Hormuzit mbetet e mbyllur dhe tensionet mes SHBA-së dhe Iranit vazhdojnë.
Një përshkallëzim i mëtejshëm i situatës mund të shtojë presionin mbi furnizimin global me energji dhe të sjellë luhatje të tjera të forta të çmimeve në tregjet ndërkombëtare.
