Eurovision ka ndryshuar rregullat për organizimin e festivalit, duke përcaktuar se vendet e përfshira në konflikte të armatosura ose në situata të ndjeshme gjeopolitike mund të humbasin të drejtën për të pritur konkursin, edhe nëse fitojnë.
Vendimi vjen pas polemikave që kanë shoqëruar Eurovisionin gjatë dy viteve të fundit për shkak të pjesëmarrjes së Izraelit dhe luftës në Gaza.
Pesë vende bojkotuan edicionin e vitit 2026, duke refuzuar të konkurronin përkrah Izraelit. Ato e lidhën vendimin me luftën në Gaza dhe krizën humanitare të shkaktuar prej saj. Pavarësisht polemikave, Izraeli iu afrua fitores si në vitin 2025, ashtu edhe në 2026, falë mbështetjes së fortë në votën e publikut. Transmetuesi izraelit KAN ka mohuar pretendimet se rezultatet janë ndikuar në mënyrë të padrejtë nga fushata të organizuara votimi.
Sipas rregullave të reja të Unionit Evropian të Transmetimeve (EBU), një transmetues fitues do të konsiderohet automatikisht i papërshtatshëm për të organizuar edicionin pasardhës nëse një konflikt i armatosur, situatë e ndjeshme gjeopolitike apo rrethana të tjera ndikojnë ndjeshëm në sigurinë ose stabilitetin e vendit dhe rajonit përreth.
Organizatorët do të kenë gjithashtu mundësinë të kërkojnë një vlerësim të pavarur të sigurisë. Nëse përcaktohet se vendi fitues nuk mund ta organizojë festivalin në kushte të sigurta, EBU do të zgjedhë një vend alternativ.
Edhe më parë ka pasur raste kur fituesi nuk ka organizuar edicionin pasardhës. Pas fitores së Ukrainës në vitin 2022, Eurovisioni i vitit 2023 u zhvillua në Mbretërinë e Bashkuar për shkak të shqetësimeve të sigurisë të lidhura me pushtimin rus.
Organizatorët thanë se ndryshimet vijnë pas reagimeve të transmetuesve pjesëmarrës pas Eurovisionit 2026 në Vjenë dhe do të zbatohen duke nisur nga edicioni i ardhshëm, që do të zhvillohet në Bullgari.
Drejtori i Eurovisionit, Martin Green, tha se rregullat synojnë të krijojnë më shumë qartësi, të mbrojnë artistët dhe të garantojnë një mjedis të sigurt për zhvillimin e konkursit.
