Ronaldo shkruan historinë në Botëror, vendos dy rekorde të reja me golin ndaj Kroacisë
Cristiano Ronaldo vazhdon të sfidojë kohën dhe të thyejë rekorde. Kapiteni i Portugalisë gjeti rrugën e rrjetës në sfidën ndaj Kroacisë në fazën e 1/16-tës së Kupës së Botës 2026, duke shtuar edhe një kapitull tjetër në karrierën e tij legjendare.
Sulmuesi portugez shënoi nga pika e bardhë në minutën e 68-të, duke barazuar rezultatin në 1-1. Me këtë gol, Ronaldo u bë futbollisti më i vjetër që shënon në fazat me eliminim direkt të një Kupe Bote, në moshën 41 vjeç e 147 ditë.
Ronaldo vendosi edhe një rekord tjetër historik, duke u bërë lojtari i parë që arrin të shënojë të paktën 25 gola në total në Kampionatin Botëror dhe Kampionatin Evropian, një arritje e realizuar përgjatë një karriere ndërkombëtare që zgjat tashmë 22 vjet.
Statistikat e Ronaldos me fanellën e Portugalisë mbeten të jashtëzakonshme. Ai është futbollisti me më shumë paraqitje në historinë e kombëtareve, me 232 ndeshje, ndërsa ka shënuar plot 146 gola. Ndjekësi më i afërt mes golashënuesve portugezë, Pedro Pauleta, ka 47 gola, plot 99 më pak se Ronaldo.
Që nga debutimi i tij në Kupën e Botës në Gjermani 2006, Cristiano Ronaldo ka vazhduar të lërë gjurmë në historinë e futbollit dhe, pothuajse dy dekada më vonë, vazhdon të thyejë rekorde, duke forcuar edhe më shumë statusin e tij si një nga futbollistët më të mëdhenj të të gjitha kohërave.
