Rama nga Lezha: Reforma në Drejtësi është dallimi mes PS-së dhe kundërshtarëve tanë

Kryeministri dhe kryetari i Partisë Socialiste, Edi Rama, deklaroi nga Lezha se historia e Partisë Socialiste në qeverisje është e lidhur me refuzimin e hakmarrjes politike dhe me ndërtimin e një sistemi drejtësie të pavarur, duke e cilësuar Reformën në Drejtësi si një nga arritjet më të rëndësishme të socialistëve.

Gjatë aktivitetit të organizuar për 35-vjetorin e Partisë Socialiste, Rama kujtoi se socialistët morën drejtimin e vendit në një nga periudhat më të vështira të historisë moderne të Shqipërisë, pas krizës së vitit 1997.

“Partia Socialiste erdhi në qeveri mbi gërmadat e një Shqipërie të shkatërruar, pasi vendi ishte kthyer në një sistem piramidash ku u varrosën kursimet e shqiptarëve. Erdhi në qeveri në ditën kur kryetari i saj doli nga burgu”, tha Rama.

Sipas tij, pavarësisht kësaj historie dhe tensioneve politike të kohës, socialistët nuk e përdorën pushtetin për t’u hakmarrë ndaj kundërshtarëve.

“Nuk thirrëm kurrë për hakmarrje dhe nuk përdorëm pushtetin për të paguar mbrapsht me të njëjtën monedhë ata që kishin vepruar kundër nesh”, u shpreh kryeministri.

Rama theksoi se Partia Socialiste zgjodhi rrugën e ndërtimit të institucioneve demokratike dhe të një drejtësie të pavarur sipas standardeve europiane, duke e konsideruar këtë si bazën e shtetit modern.

“Ne e kemi kërkuar drejtësinë tek ndërtimi i një Shqipërie europiane demokratike, e cila nuk mund të ekzistojë pa një drejtësi të pavarur dhe pa ndarjen e pushtetit politik nga pushteti i drejtësisë”, deklaroi ai.

Kreu i qeverisë e cilësoi Reformën në Drejtësi si shembullin më domethënës të kësaj qasjeje politike, duke argumentuar se përmes saj u krijuan kushtet që askush të mos jetë mbi ligjin.

“Reforma në Drejtësi është kulmi i të gjithë shembujve që e dallojnë Partinë Socialiste nga të tjerët që flasin për drejtësi dhe na sulmojnë në emër të saj”, tha Rama.

Ai shtoi se hetimet dhe procedimet ndaj zyrtarëve publikë nuk janë tregues i rritjes së korrupsionit, por pasojë e funksionimit të institucioneve të reja të drejtësisë.

“Këto ndodhin sot jo sepse ne jemi më të korruptuar, por sepse kemi qenë të vendosur të luftojmë korrupsionin dhe kemi pranuar koston e këtij procesi, duke ia lënë shpatën e drejtësisë institucioneve të pavarura”, u shpreh ai.

Rama theksoi se ndërtimi i një drejtësie të pavarur ka qenë një proces i vështirë dhe i paprecedentë në historinë e vendit, ndërsa shtoi se Shqipëria ka ende nevojë për vazhdimin e reformave dhe transformimeve të nisura.

“Ne kemi bërë gabime dhe kemi të metat tona, por kur vjen puna te pamja e madhe, ajo flet vetë për raportin tonë me interesin kombëtar, me historinë, me shoqërinë dhe me botën”, deklaroi kryeministri.

Deklaratat e Ramës u bënë në kuadër të turit të takimeve për 35-vjetorin e Partisë Socialiste, ku kreu i qeverisë po zhvillon aktivitete në disa qarqe të vendit.