Presidenti rus Vladimir Putin i ka dhënë qeverisë kompetenca për të marrë përkohësisht nën administrim objekte të infrastrukturës kritike, në rast se pronarët e tyre nuk marrin masat e nevojshme për t’i mbrojtur nga kërcënimet e sigurisë, përfshirë sulmet me dronë.
Sipas një dekreti të publikuar të hënën, Agjencia Federale ruse për Menaxhimin e Pronës Shtetërore do të ketë kompetenca të gjera për të marrë kontrollin e përkohshëm të objekteve industriale, nëse pronarët nuk kanë garantuar mbrojtjen e tyre ndaj mjeteve ajrore pa pilot dhe rreziqeve të tjera.
Agjencia do të mund t’i administrojë bizneset e marra nën kontroll sikur të ishte pronare e tyre, ndërsa Putin do të ketë të drejtën të caktojë edhe subjekte të tjera si administratorë të përkohshëm.
Në listën e objekteve që konsiderohen kritike përfshihen infrastruktura e karburanteve dhe energjisë, impiantet industriale dhe platformat logjistike.
Zëvendëskryeministri i parë rus, Denis Manturov, mohoi se masa përbën një proces nacionalizimi.
“Nuk po flasim për nacionalizim”, deklaroi Manturov, duke argumentuar se pronarët e bizneseve kanë treguar nivele të ndryshme përgjegjësie përballë kërcënimeve të sigurisë.
Sipas tij, në disa raste, garantimi i sigurisë së objekteve dhe punonjësve “për fat të keq, nuk është prioritet” për drejtuesit e kompanive.
Vendimi vjen në një periudhë kur Rusia po përballet me një intensifikim të sulmeve ukrainase me dronë me rreze të gjatë veprimi. Mes objektivave të goditura së fundmi kanë qenë infrastruktura energjetike, si dhe objektet e kompanive të mëdha të tregtisë online Wildberries dhe Ozon.
Sipas një raporti të ushtrisë ukrainase të publikuar në korrik, sulmet e Kievit kanë nxjerrë jashtë funksionit rreth 43% të kapacitetit të rafinimit të naftës në Rusi.
Masa e re vjen gjithashtu në vazhdën e përpjekjeve të Kremlinit për të rritur kontrollin shtetëror mbi asetet private që prej nisjes së pushtimit në shkallë të gjerë të Ukrainës në shkurt 2022.
Sipas kreut të Agjencisë Federale për Menaxhimin e Pronës Shtetërore, Vadim Yakovenko, rreth 805 kompani kanë kaluar nën kontrollin e shtetit rus gjatë periudhës 2022-2026.
