Ministri i Jashtëm rus, Sergei Lavrov, ka hedhur poshtë akuzat për përfshirjen e Moskës në incidentin me një dron të pajisur me eksplozivë në aeroportin Leipzig/Halle, duke paralajmëruar se pretendimet e ngritura ndaj Rusisë mund të çojnë në një përshkallëzim serioz.
“Akuzat kundër Rusisë janë fillimi i një lufte të vërtetë”, deklaroi Lavrov, ndërsa i cilësoi pretendimet e Berlinit si një provokim të nxituar.
Incidenti në aeroportin Leipzig/Halle është kthyer në një tjetër pikë tensioni mes Gjermanisë dhe Rusisë. Autoritetet gjermane dyshojnë se droni i zbuluar pranë një avioni transporti ukrainas ishte i pajisur me eksplozivë dhe kishte karakteristika të teknologjisë ruse.
Hetimet kanë çuar deri tani te dy persona të dyshuar për përfshirje në operacion. Njëri prej tyre është një burrë me origjinë ruse dhe pasaportë letoneze, për të cilin hetuesit dyshojnë se mund të ketë koordinuar operacionin dhe të ketë pasur kontakte me shërbimet sekrete ruse.
Sipas mediave gjermane, i dyshuari kishte hyrë në Gjermani përmes aeroportit të Berlinit dhe më pas kishte udhëtuar me një makinë me qira drejt Leipzigut. Pas incidentit, ai dyshohet se është larguar sërish nga territori gjerman.
Hetuesit kanë përdorur edhe prova biologjike për të identifikuar një person të dytë. Gjurmë ADN-je u gjetën në një prej dronëve, brenda një ene metalike ku ndodheshin eksplozivë, si dhe në një antenë të vendosur pranë aeroportit.
Sipas autoriteteve, antena mund të jetë përdorur për të përforcuar sinjalet e telefonisë celulare që shërbenin për kontrollin e dronëve.
Krahasimi i materialit gjenetik me bazat europiane të të dhënave i çoi hetuesit te një burrë me origjinë bjelloruse, i cili disponon gjithashtu pasaportë ruse. Autoritetet kanë rindërtuar lëvizjet e tij dhe dyshojnë se ai kishte hyrë në Gjermani me një vizë turistike italiane.
Megjithatë, autoritetet gjermane vazhdojnë të tregohen të kujdesshme për sa i përket përcaktimit përfundimtar të rolit të mundshëm të shtetit rus në incident dhe mundësisë për t’i çuar personat e dyshuar përpara drejtësisë.
Moska ka mohuar çdo përfshirje. Ambasada ruse në Berlin e ka cilësuar çështjen një “provokim të nxituar” dhe ka akuzuar Gjermaninë për nxitjen e një vale të re të asaj që e përshkruan si “histeri anti-ruse”.
Deklaratat e Lavrov vijnë në një moment tensionesh të larta mes Moskës dhe Berlinit, ndërsa Gjermania dhe aleatët e saj europianë po hetojnë një sërë incidentesh dhe aktivitetesh të dyshuara hibride që i atribuohen Rusisë. Moska i ka mohuar vazhdimisht këto akuza.
