Ish-kreu i Partisë Republikane Popullore (CHP), Özgür Özel, ka prezantuar forcën e tij të re politike, “Yeni Parti”, me synimin për të bashkuar opozitën turke përpara zgjedhjeve presidenciale të vitit 2028 dhe për të sfiduar pushtetin e presidentit Recep Tayyip Erdogan.
Në një artikull të botuar në Corriere della Sera, Özel deklaron se pas më shumë se dy dekadash të Erdoganit në pushtet, Turqia ndodhet përballë një momenti vendimtar politik. Sipas tij, institucionet shtetërore janë vendosur gjithnjë e më shumë nën kontroll politik, mediat e pavarura janë dobësuar dhe sistemi i drejtësisë është përdorur kundër kundërshtarëve të qeverisë.
Özel argumenton se në shekullin XXI autoritarizmi nuk funksionon domosdoshmërisht duke eliminuar zgjedhjet, por duke dobësuar gradualisht institucionet që garantojnë një konkurrencë të lirë politike.
“Nuk bëhet më fjalë vetëm për atë se kush fiton zgjedhjet. Pyetja është nëse konkurrenca politike në Turqi do të mbetet vërtet e lirë. Ne refuzojmë të pranojmë që opozitës demokratike t’i vendosen kufij”, shkruan ai.
Largimi i Özel nga CHP erdhi pas një vendimi gjykate në maj, i cili anuloi kongresin e vitit 2023 ku ai ishte zgjedhur kryetar dhe riktheu në drejtimin e partisë ish-liderin Kemal Kiliçdaroglu.
Kriza brenda opozitës turke u thellua më tej pas arrestimit të kryebashkiakut të Stambollit, Ekrem Imamoglu, një nga rivalët kryesorë politikë të Erdoganit.
Pas krijimit të “Yeni Parti”, 91 deputetë iu bashkuan menjëherë formacionit të ri. Më 13 gusht, pjesë e partisë u bë edhe Imamoglu, duke i dhënë forcës së re politike një peshë të konsiderueshme në kampin opozitar.
Özel këmbëngul se krijimi i partisë së re nuk përfaqëson një shkëputje nga tradita republikane dhe socialdemokrate që ai përfaqësonte në CHP. Përkundrazi, sipas tij, është një përpjekje për ta mbrojtur dhe zgjeruar atë përmes një platforme më të gjerë politike.
“Yeni Parti” synon të tërheqë jo vetëm votuesit tradicionalë të opozitës, por edhe të rinjtë që e shohin të ardhmen e tyre jashtë Turqisë, punëtorët e prekur nga rënia e standardit të jetesës, fermerët, pensionistët, gratë dhe sipërmarrësit.
Në qendër të platformës së re, sipas Özel, do të jenë pavarësia e gjyqësorit, zgjedhjet e lira, llogaridhënia e pushtetit dhe barazia e qytetarëve përpara ligjit.
Ai e lidh rikthimin e standardeve demokratike edhe me perspektivën ekonomike të vendit. Sipas tij, institucionet e pavarura dhe një sistem gjyqësor i besueshëm mund të rrisin sigurinë për investitorët dhe të forcojnë pozicionin ndërkombëtar të Turqisë.
“Për ne, demokracia nuk është vetëm një parim moral, por një pasuri strategjike. Një Turqi demokratike do të ishte më e lirë, më e fortë ekonomikisht dhe një partnere më e besueshme për Evropën dhe Mesdheun”, shkruan Özel.
Objektivi i “Yeni Parti”, sipas ish-kreut të CHP-së, shkon përtej fitores në zgjedhjet e ardhshme. Ai synon të ndërtojë një front më të gjerë opozitar dhe të bindë qytetarët se ndryshimi politik është ende i mundur pas më shumë se dy dekadash të dominuara nga Erdogan.
“Duam të tregojmë se autoritarizmi nuk është fati i Turqisë. Për më shumë se dy dekada, Erdogan ka dominuar jetën politike të vendit. Por asnjë epokë politike nuk zgjat përgjithmonë. Një epokë e re ka nisur”, përfundon Özel.
