Presidentja e Komisionit Evropian, Ursula von der Leyen, ka mbërritur në Kiev për një vizitë zyrtare, ku do të zhvillojë bisedime me presidentin ukrainas Volodymyr Zelensky për forcimin e bashkëpunimit në fushën e mbrojtjes, me fokus të veçantë në prodhimin e dronëve.
Kjo është vizita e dytë e Von der Leyen në Ukrainë gjatë këtij viti dhe vjen në një moment kur Kievi ka shënuar përparim si në frontin ushtarak, ashtu edhe në procesin e integrimit evropian.
“Ukraina ka ndërtuar një vrull të fortë ushtarak. Batica po ndryshon. Bashkimi Evropian po luan plotësisht rolin e tij me kredinë prej 90 miliardë eurosh. Në Kiev do të shpall iniciativa të reja për të thelluar integrimin e industrive tona të mbrojtjes”, deklaroi Von der Leyen pas mbërritjes.
Në qendër të takimeve do të jetë një marrëveshje e re mes Bashkimit Evropian dhe Ukrainës për zhvillimin dhe prodhimin e dronëve ushtarakë, të cilët kanë marrë një rol vendimtar në luftën kundër Rusisë.
Presidenti Volodymyr Zelensky ka paralajmëruar prej javësh arritjen e një “marrëveshjeje për dronët” me Bashkimin Evropian. Një nga elementët kryesorë të saj pritet të jetë ruajtja dhe prodhimi i një pjese të këtyre mjeteve pa pilot në territorin e vendeve anëtare të BE-së.
Sipas palëve, bashkëpunimi do t’i mundësojë Ukrainës të përfitojë nga kapacitetet industriale të Evropës, ndërsa Bashkimi Evropian do të shfrytëzojë përvojën dhe inovacionin teknologjik që Ukraina ka zhvilluar gjatë luftës.
Gjatë vizitës, presidenti Zelensky pritet ta dekorojë Ursula von der Leyen me Urdhrin e Evropës, një dekoratë e krijuar së fundmi për të nderuar personalitetet që kanë kontribuar në mbështetjen e pavarësisë së Ukrainës dhe në avancimin e procesit të saj të anëtarësimit në Bashkimin Evropian.
Presidentja e Komisionit Evropian do të marrë pjesë gjithashtu në edicionin e pestë të Samitit Ukrainë–Evropë Juglindore, ku do të jenë të pranishëm edhe liderë nga Kroacia, Moldavia, Rumania dhe vende të tjera të rajonit.
