Një gjykatë në Paris ka rrëzuar ankesën e gazetares ruse dhe ish-drejtoreshës së televizionit RT France, Xenia Fedorova, kundër vendimit të autoriteteve franceze për dëbimin e saj nga vendi.
Vendimi vjen një javë pasi qeveria franceze e akuzoi Fedorovën se kishte vepruar si “kanal për fushatat e dezinformimit” të orkestruara nga Moska, me synimin për të destabilizuar rendin publik në Francë.
Fedorova, e cila ndodhet në arrest shtëpiak në Paris që prej së mërkurës së kaluar, kishte kundërshtuar tre masa të marra nga autoritetet franceze: urdhrin e dëbimit, detyrimin për të qëndruar në Paris dhe për t’u paraqitur çdo ditë në polici, si dhe ngrirjen e pasurive të saj për një periudhë gjashtëmujore.
Megjithatë, gjykata administrative vendosi se ajo nuk kishte arritur të provonte se këto masa i shkaktonin një dëm të menjëhershëm dhe serioz, duke rrëzuar kërkesën për pezullimin e tyre.
Ish-drejtuesja e RT France, kanal i mbështetur nga Kremlini, ka qenë vitet e fundit një komentatore e rregullt në mediat në pronësi të miliarderit konservator francez Vincent Bolloré, përfshirë CNews dhe Europe 1, ku ka shprehur vazhdimisht qëndrime pro-ruse lidhur me luftën në Ukrainë, NATO-n dhe sigurinë evropiane. Pikëpamjet e saj janë vënë nën vëzhgim të shtuar ndërsa Franca i afrohet zgjedhjeve presidenciale të vitit 2027.
Në një reagim të publikuar të premten në rrjetet sociale, Fedorova mohoi akuzat ndaj saj, duke pretenduar se qeveria e presidentit Emmanuel Macron po ushtron “presion politik” dhe “censurë ndaj opinioneve që nuk përputhen me narrativën zyrtare”. Ajo argumentoi se kishte ushtruar thjesht të drejtën e saj për të shprehur mendimin, pas gati një dekade jetese në Francë.
Ministri francez i Brendshëm, Laurent Nuñez, mbrojti vendimin për dëbimin, duke deklaruar se Fedorova “thjesht përcjell propagandën ruse”, e cila synon “të minojë funksionimin demokratik të Francës”.
Edhe ministri i Jashtëm francez, Jean-Noël Barrot, e ka cilësuar atë si “një propagandiste të provuar”, që shërben si kanal për dezinformimin e Kremlinit.
Vendimi i së hënës lidhet vetëm me kërkesën e Fedorovës për pezullimin e masave të vendosura ndaj saj dhe jo me shqyrtimin në themel të ligjshmërisë së urdhrit të dëbimit, i cili do të trajtohet në një procedurë të veçantë gjyqësore.
