Kina ka kundërshtuar ashpër sanksionet e vendosura nga Shtetet e Bashkuara ndaj kompanive dhe individëve kinezë për aktivitetet e tyre të dyshuara në lidhje me Iranin, duke i kërkuar Washingtonit të tërheqë masat dhe të ndryshojë politikën e tij.
Zëdhënësja e Ministrisë kineze të Tregtisë, Huang Ling, deklaroi të enjten se Pekini kundërshton “në mënyrë të vendosur” sanksionet e njëanshme që, sipas Kinës, nuk mbështeten në të drejtën ndërkombëtare dhe nuk janë autorizuar nga Këshilli i Sigurimit i Kombeve të Bashkuara.
Huang tha se autoritetet kineze i kanë ngritur vazhdimisht shqetësimet e tyre me palën amerikane, por Washingtoni ka vijuar me vendosjen e masave ndëshkuese ndaj subjekteve kineze.
Pekini shprehu “pakënaqësi të fortë” për sanksionet, duke argumentuar se ato cenojnë marrëdhëniet normale ekonomike dhe tregtare mes vendeve dhe mund të ndikojnë gjithashtu në sigurinë globale të energjisë.
Ministria kineze e Tregtisë i bëri thirrje SHBA-së të tërheqë masat dhe paralajmëroi se Pekini do të ndërmarrë hapat e nevojshëm për të mbrojtur të drejtat dhe interesat e ligjshme të kompanive dhe qytetarëve kinezë.
Në korrik, Shtetet e Bashkuara njoftuan sanksione ndaj gjashtë individëve dhe subjekteve në katër vende, përfshirë Kinën. Sipas Washingtonit, ata ishin përfshirë në aktivitete që mbështesnin Gardën Revolucionare Islamike të Iranit (IRGC) dhe rrjetin e transportit të lidhur me të, përfshirë kompaninë ajrore Mahan Air.
Masat janë pjesë e përpjekjeve amerikane për të kufizuar aksesin e Iranit në sistemin financiar ndërkombëtar dhe për të shtuar presionin ekonomik ndaj Teheranit.
Përplasja për sanksionet vjen në një periudhë të ndjeshme për marrëdhëniet mes dy fuqive, të cilat vazhdojnë të kenë mosmarrëveshje për një sërë çështjesh tregtare, ekonomike dhe gjeopolitike.
Tensionet rreth Iranit pritet të jenë gjithashtu pjesë e kontakteve të ardhshme mes presidentit kinez Xi Jinping dhe presidentit amerikan Donald Trump. Vizitat reciproke të planifikuara të dy liderëve shihen si një mundësi për të diskutuar çështjet që vazhdojnë të rëndojnë marrëdhëniet mes Pekinit dhe Washingtonit.
