Hungaria është pranë përmbushjes së kushteve të vendosura nga Bashkimi Evropian për zhbllokimin e rreth 10 miliardë eurove nga fondet e rimëkëmbjes, ndërsa afati për realizimin e reformave përfundon në fund të gushtit.
Sipas burimeve nga Komisioni Evropian dhe qeveria hungareze, Budapesti ka ende mundësi të përmbushë në kohë 27 objektivat e kërkuara. Prej tyre, 21 lidhen me luftën kundër korrupsionit dhe transparencën, katër me pavarësinë e sistemit gjyqësor dhe dy me kontrollin e përdorimit të fondeve evropiane.
Qeveria hungareze deklaron se rreth dy të tretat e angazhimeve janë përmbushur, ndërsa masat e mbetura ndodhen në fazën përfundimtare. Nëse procesi përfundon brenda gushtit, Komisioni Evropian pritet të bëjë vlerësimin gjatë shtatorit, duke i hapur rrugën kërkesës për pagesën e fondeve.
Në total, bëhet fjalë për 16.4 miliardë euro fonde të BE-së për Hungarinë. Rreth 10 miliardë euro lidhen me Instrumentin e Rimëkëmbjes dhe Rezistencës, ndërsa 6.4 miliardë euro me Fondet e Kohezionit.
Gjatë muajve të fundit, Budapesti ka miratuar masa kundër korrupsionit, rregulla më të forta për deklarimin e pasurive të politikanëve, rritjen e transparencës në prokurimet publike dhe reforma në sistemin e drejtësisë.
Qeveria e kryeministrit Péter Magyar e ka vendosur zhbllokimin e fondeve evropiane mes prioriteteve të saj, pas viteve të përplasjeve mes Brukselit dhe qeverisë së mëparshme të Viktor Orbánit lidhur me sundimin e ligjit dhe korrupsionin.
Nëse të gjitha kushtet plotësohen dhe marrin miratimin e institucioneve evropiane, Hungarisë mund t’i hapet rruga për të përfituar miliardat e bllokuara brenda këtij viti.
