Presidenti ukrainas Volodymyr Zelensky i ka akorduar Elon Musk “Urdhrin e Lirisë”, një nga dekoratat shtetërore të Ukrainës, ndërsa Kievi po përpiqet ta bindë miliarderin të zgjerojë mundësinë e përdorimit të rrjetit Starlink.
Në dekretin presidencial, Musk vlerësohet për kontributin në “mbrojtjen e jetës dhe lirisë së njerëzve”, si dhe për zhvillimin e marrëdhënieve mes Ukrainës dhe Shteteve të Bashkuara.
Rrjeti satelitor Starlink i SpaceX ka luajtur një rol të rëndësishëm në ruajtjen e komunikimeve të forcave ukrainase që prej nisjes së pushtimit rus në shkallë të gjerë në vitin 2022.
Në shkurt të këtij viti, SpaceX çaktivizoi mijëra terminale Starlink që përdoreshin nga forcat ruse, duke kufizuar kapacitetet e tyre të komunikimit në fushën e betejës.
Tashmë, Ukraina kërkon që Musk të lejojë përdorimin e Starlink nga ushtria ukrainase edhe brenda territorit rus. Një ndryshim i tillë do t’i mundësonte Kievit të përmirësonte koordinimin e operacioneve me dronë dhe raketa në thellësi të Rusisë.
Sipas Zelenskyt, Musk deri tani e ka kundërshtuar këtë mundësi me argumentin se do të përbënte përshkallëzim të konfliktit, por presidenti ukrainas shpreson se ai mund të ndryshojë qëndrim.
“Për momentin, Musk ka thënë se kjo do të ishte një përshkallëzim. Por ai mund të ndryshojë mendim kur të dëgjojë më shumë argumente”, deklaroi Zelensky.
“Urdhri i Lirisë” u është akorduar edhe liderëve të huaj për mbështetjen ndaj Ukrainës, mes tyre presidentit francez Emmanuel Macron, kryeministrit britanik Andy Burnham dhe presidentit të Lituanisë Gitanas Nausėda.
