Shkollat suedeze kufizojnë mësimin digjital dhe kërkojnë rikthimin te librat

Qeveria e Suedisë po promovon një rikthim të fortë te librat fizikë, letra dhe stilolapsat në shkolla, në një përpjekje për të përmbysur rënien e niveleve të leximit dhe shkrimit.

Megjithatë, kjo kthesë drejt metodave tradicionale ka nxitur kritika nga kompani teknologjike, arsimtarë dhe ekspertë të informatikës, të cilët paralajmërojnë se mund të ndikojë negativisht në aftësitë e nxënësve për tregun e punës dhe madje në ekonominë e vendit, sipas BBC.

Në një shkollë të mesme në Nacka, pranë Stokholmit, nxënësit e vitit të fundit po rikthehen te librat dhe fletoret, përveç laptopëve që ende mbajnë me vete.

Një nxënëse 18-vjeçare thotë se mësuesit kanë filluar të printojnë materialet mësimore dhe të zëvendësojnë platformat digjitale me tekste tradicionale.

Ky ndryshim bie në kontrast me reputacionin e Suedisë si një nga shoqëritë më të avancuara digjitale në Evropë.

Përdorimi i teknologjisë në shkollat suedeze u përhap gjerësisht në fund të viteve 2000 dhe fillim të viteve 2010, ndërsa deri në vitin 2015 rreth 80% e nxënësve kishin akses individual në pajisje digjitale.

Në vitin 2019, përdorimi i tabletëve u bë pjesë e detyrueshme edhe në kopshtet për fëmijë, si pjesë e përgatitjes për një jetë gjithnjë e më digjitale.

Por qeveria aktuale e djathtë, e ardhur në pushtet në vitin 2022, po ndjek një drejtim të ri.

Ajo synon të reduktojë përdorimin e ekraneve, veçanërisht për fëmijët më të vegjël, duke argumentuar se mësimi pa pajisje digjitale përmirëson përqendrimin dhe zhvillimin e aftësive bazë.

Një ndalim i përdorimit të telefonave në shkolla pritet të hyjë në fuqi këtë vit, ndërsa janë ndarë miliarda krona për blerjen e teksteve dhe materialeve tradicionale.

Qeveria shpreson që ky rikthim te metodat tradicionale të përmirësojë rezultatet e Suedisë në testet ndërkombëtare si ato të OECD.

Performanca e vendit ka rënë vitet e fundit, veçanërisht në lexim dhe matematikë, me rreth 24% të nxënësve që nuk arrijnë nivelin bazë të të kuptuarit të tekstit.

Megjithatë, kundërshtarët paralajmërojnë se një sistem më pak digjital mund të lërë nxënësit të papërgatitur për të ardhmen.

Sipas industrisë së teknologjisë arsimore, aftësitë digjitale janë thelbësore, pasi pritet që rreth 90% e vendeve të punës në Bashkimin Evropian të kërkojnë njohuri bazë në teknologji.

Debati mbetet i hapur mes nevojës për përqendrim dhe thellim në mësim dhe domosdoshmërisë për t’u përshtatur me një botë gjithnjë e më digjitale.