×
Sunday, September 26, 2021

Zjarret, përpjekje koordinuese midis ekipeve shqiptare, amerikane, çeke dhe holandeze

August 13, 2021

Përpjekjet koordinuese midis ekipeve shqiptare, amerikane, çeke dhe holandeze, kanë mundësuar luftë efikase ndaj zjarreve. Ambasada e Shteteve të Bashkuara të Amerikës në Tiranë, bëri të ditur sot se, “që prej mbërritjes në Shqipëri për të ndihmuar me përpjekjet e koordinimit dhe përgjigjes ndaj zjarreve në vend, ekipi ynë amerikan i ekspertëve nga Byroja për Ndihmë Humanitare e USAID, kanë ndihmuar forcat e Mbrojtjes Civile dhe Ndihmës Humanitare të Bashkimit Europian dhe ato shqiptare”.

“Sot, punonjësja zjarrfikëse e Shërbimit Pyjor të Shteteve të Bashkuara të Amerikës, Renee Jack, u takua me pilotë holandezë dhe shqiptarë në Bazën Ajrore Ushtarake të Rinasit në Tiranë, për të diskutuar qasjen e tyre strategjike ndaj përgjigjes për zjarret”, theksoi ambasada amerikane.

“Ekipi ynë i ekspertëve ka ofruar gjithashtu trajnime mbi sigurinë dhe menaxhimin e rrezikut për operacionet e helikopterëve, manovrat e zjarrit në terren, taktikat e helikopterëve për zjarrin në terren, si dhe menaxhimin e komunikimin”, nënvizoi ambasada. “Vendet tona vazhdojnë të jenë të bashkuara në përpjekjet dhe bashkëpunimin tonë gjatë kësaj kohe të vështirë për Shqipërinë. Krah për krah”, përfundon ambasada e SHBA.

Eunews.al

Comments are closed.