×
E mërkurë, 21 Tetor, 2020

“Vendimi i Malit të Zi për shtetasit e Serbisë është politik”

27 Maj, 2020

Presidenti i Serbisë, Aleksandar Vuçiç, sot deklaroi se nuk ka asnjë dyshim se vendimi i Malit të Zi që kufijtë e tij nga 1 qershori të mos hapen për shtetasit e Serbisë, është vendim politik.

Ai para gazetarëve tha se Serbia nuk do të marrë vendim për ndalimin e shtetasve malazezë në kufijtë e tyre.

“Ne do të mbajmë kufijtë e hapur, sepse mendojmë se kjo është në frymën evropiane, por edhe serbe, në frymën e marrëdhënieve të mira dhe miqësore. Mos harroni se me mbylljen e kufijve ne do të dënojmë 30 për qind të serbëve që jetojnë atje, por nuk duam të dëmtojmë as të tjerët që jetojnë në Mal të Zi”, tha Vuçiç.

Ai pyeti se si ka mundur Podgorica të hap kufijtë për shtetasit e Gjermanisë, kur ky vend, siç tha “ka 30 herë më shumë vdekje sesa Serbia, dhe kush e di sa më shumë të infektuar me koronavirus”.
“Si mundet Austria dhe Sllovenia të jenë në atë listë kur proporcionalisht kanë vdekje më të lartë se Serbia? Më mirë të mos testojmë askënd sikur shumica në rajon”, tha ai.

Ai theksoi se është i bindur se Podgorica do të ndryshojë këtë vendim, sepse sipas vlerësimit të tij, kështu do të kërkojnë interesat e tyre.

“Ata janë vëllezërit tanë, pavarësisht cilës fe apo komb i përkasin. Të gjithë qytetarët e Malit të Zi janë të mirëseardhur në Serbi dhe nuk kanë asnjë problem. Asnjë kufizim në bazë kombëtare, fetare apo përkatësie tjetër nuk do të vendosim, kurse faleminderit atyre që treguan se çka mendojnë për ne, me këtë më shumë flasin për veten, sesa për ne”, shtoi ai.

Më tej vlerësoi se vendimi i Drejtorisë së Fluturimeve Civile për pezullimin e aterimit të avionëve “Montenegro Airlines” në aeroportin e Beogradit, “është përgjigja më elegante dhe më e qëlluar e Beogradit ndaj vendimit të Podgoricës”.

“Ne do të mbyllim kufijtë për 50 apo 100 presona të tjerë nga grupet kriminale të Malit të Zi, kjo është masa që do të ndërmarrim”, tha ai.

I pyetur për paralajmërimin e Prishtinës se pas 15 qershorit do të vendosin masa të reja të reciprocitetit, Vuçiç u përgjigj se “nuk e di me çka kërcënojnë”.

“Mundohemi të ndërtojmë marrëdhënie të mira kryesisht për hir të serbëve në Kosovë dhe të ruajmë paqen dhe stabilitetin, por është e pamundur të pranojë atë se çfarë bëjnë disa dhe çfarë kërkojnë të tjerët. E gjithë kjo është në kuadër të konfliktit të tyre politik, dhe unë nuk dua të merrem me paragjykime”, deklaroi Vuçiç.

Komente

avatar
  Ndiqe  
Me lajmëro për