×
Monday, November 29, 2021

Shkarkimi i Metës, Gjykata Kushtetuese cakton seancën më 18 janar 2022

November 17, 2021

Gjykata Kushtetuese ka caktuar sot datën e seancës për çështjen e shkarkimit të Presidentit Ilir Meta.

Sipas njoftimit të Gjykatës Kushtetuese seanca do të mbahet më 18 janar 2022, ora 10:00, me objekt “Për shkarkimin e Presidentit të Republikës së Shqipërisë për shkelje të rënda të Kushtetutës”.

Çështja e shkarkimit të Presidentit shkoi në Kushtetuese pasi, 104 deputetë nga 140 që ka gjithsej parlamenti i Shqipërisë votuan pro shkarkimit të Presidentit Meta në qershor të këtij viti.

Socialistët e fajësojnë Metën për deklaratat publike para dhe gjatë fushatës së 25 prillit të këtij viti, të cilat sipas tyre kanë nxitur dhunë dhe kanë shkelur rëndë Kushtetutën.

Votimi erdhi pas një raporti të hartuar nga një komision hetimor me pjesëmarrjen edhe të opozitës, i ngritur posaçërisht për hetimin dhe analizimin e qëndrimit të Presidentit Meta para dhe gjatë fushatës elektorale.

Sipas raportit, Presidenti Meta ka shkelur më shumë se 10 nene të Kushtetutës gjë që, sipas mazhorancës socialiste, ka sjellë mosgarantimin e unitetit kombëtar duke mbajtur anën e opozitës para zgjedhjeve të 25 prillit dhe nxitur destabilitet dhe dhunë.

Nëse gjykatësit kushtetues e gjykojnë të ligjshëm vendimin e Parlamentit, Presidenti Meta duhet ta lerë detyrën e lartë pa e përfunduar mandatin e tij pesëvjeçar, që mbaron në korrik 2022.

Eunews.al

Comments are closed.