Irani dhe SHBA-ja do të zhvillojnë më shumë negociata javën e ardhshme lidhur me avancimin e shpejtë të programit bërthamor të Teheranit, njoftoi televizioni shtetëror iranian në fund të raundit të parë të bisedimeve midis dy vendeve – që kur presidenti, Donald Trump u kthye në Shtëpinë e Bardhë, sipas AP.
Transmetuesi shtetëror i Iranit zbuloi se i dërguari i SHBA-së për Lindjen e Mesme, Steve Witkoff dhe ministri i Jashtëm iranian, Abbas Araghchi “folën shkurt” së bashku – hera e parë që të dy vendet e bëjnë këtë që nga administrata e Obama-s.
Deklarata e Teheranit se të dy palët folën ballë për ballë – edhe pse shkurt – sugjeron që negociatat shkuan mirë edhe për televizionin shtetëror iranian, i cili është kontrolluar prej kohësh nga linjat e ashpra.
Në një deklaratë të lëshuar të shtunën pasdite, Shtëpia e Bardhë i përshkroi diskutimet si “shumë pozitive dhe konstruktive”, ndërsa pranoi se çështjet që duhet të zgjidheshin ishin shumë të ndërlikuara.
“Komunikimi i drejtpërdrejtë i të dërguarit special Witkoff sot ishte një hap përpara në arritjen e një rezultati reciprokisht të dobishëm”, tha Shtëpia e Bardhë.
Trump u tha gazetarëve në “Air Force One” ndërsa po fluturonte për në Miami – se bisedimet kishin shkuar mirë.
“Situata në Iran po shkon shumë mirë, mendoj”, tha ai.
“Raundi tjetër i bisedimeve do të zhvillohet të shtunën, më 19 prill”, sipas deklaratave iraniane dhe amerikane.
Raundi i parë i bisedimeve nisi dje rreth orës 15:30. Të dyja palët diskutuan për më shumë se dy orë në një vend në periferi të Muscat, kryeqyteti i Omanit.
Bisedimet mes SHBA-së dhe Iranit përfunduan rreth orës 17:50
