SHBA dhe BM mirëpresin urdhërarrestin kundër Putinit
Presidenti i SHBA, Joe Biden i është bashkuar Britanisë së Madhe dhe ka mirëpritur vendimin e Gjykatës Penale Ndërkombëtare (ICC) për të lëshuar një urdhërarresti për presidentin rus Vladimir Putin për krime lufte në Ukrainë.
Biden tha se Putin kishte “kryer krime lufte” dhe urdhërarresti, megjithëse nuk njihet në SHBA, ishte “i justifikuar” dhe ishte “një pikë shumë e fortë”.
Vërejtjet e tij erdhën pasi sekretari i Jashtëm i Mbretërisë së Bashkuar James Cleverly tha se ishte thelbësore që ata në krye të regjimit në Moskë të mbaheshin përgjegjës për mizoritë që kanë ndodhur që nga pushtimi i një viti më parë.
ICC me qendër në Hagë tha se po lëshonte urdhrin për arrestimin e liderit rus lidhur me rrëmbimin dhe deportimin e dyshuar të mijëra fëmijëve ukrainas në Rusi.
Akuzat u hodhën poshtë menjëherë nga Kremlini, i cili nuk e njeh ICC-në.
Cleverly tha në një deklaratë të postuar në mediat sociale se “ata që janë përgjegjës për krimet e tmerrshme të luftës në Ukrainë duhet të sillen para drejtësisë. Ne mirëpresim hapin e ndërmarrë… për të kërkuar llogari nga ata që janë në krye të regjimit rus, përfshirë Vladimir Putinin. Puna duhet të vazhdojë për të hetuar mizoritë e kryera”.
Udhëheqësi i laburistëve Keir Starmer gjithashtu mbështeti masën.
“Njoftimi i sotëm dërgon një mesazh të rëndësishëm, se nuk do të ketë vend të fshehtë për Putinin dhe miqtë e tij dhe bota është e vendosur t’i bëjë ata të paguajnë për atë që kanë bërë”, tha ai.
