Rusi i akuzuar nga SHBA për shmangie të sanksioneve i shpëton arrestit shtëpiak
Një shtetas rus, i cili ishte në prag të ekstradimit në SHBA me akuzën në lidhje me një skemë evazioni sanksionesh globale dhe pastrim parash, i shpëtoi arrestit shtëpiak në Milano.
”Artem Uss, djali i guvernatorit të rajonit të Krasnoyarsk Krai të Rusisë në Siberi, theu byzylykun e tij elektronik, të urdhëruar për t’u mbajtur nga gjykata, dhe u largua nga shtëpia, ku ai priste ekstradimin në SHBA dy ditë pasi u miratua nga një gjykatës”, njoftoi ANSA.
Uss u arrestua në aeroportin ”Malpensa” të Milanos me kërkesë të SHBA-së, teksa ishte gati të hipte në një fluturim për në Stamboll, më 17 tetor.
Dy ditë më vonë, prokurorët amerikanë akuzuan Uss dhe katër shtetas të tjerë rusë për orkestrimin e një skeme për të marrë në mënyrë të paligjshme teknologjinë ushtarake amerikane dhe naftën e sanksionuar nga Venezuela.
Në atë kohë, prokurori amerikan Breon Peace tha se përpjekjet e grupit “minuan sigurinë, stabilitetin ekonomik dhe shtetin e së drejtës në mbarë botën”.
Sipas prokurorëve, skema përfshinte një kompani gjermane, e cila u përdor për të marrë dhe blerë teknologji të ndjeshme ushtarake dhe me përdorim të dyfishtë nga prodhuesit amerikanë, përfshirë gjysmëpërçues dhe mikroprocesorë të avancuar, të përdorur në avionë luftarakë, sisteme raketore, municione inteligjente, radarë, satelitë dhe aplikacione të tjera ushtarake të bazuara në hapësirë.
Teknologjia më pas u dërgua te përdoruesit përfundimtarë rusë, përfshirë kompanitë e sanksionuara.
Që nga fillimi i pushtimit të plotë të Ukrainës nga Rusia pak më shumë se një vit më parë, SHBA dhe aleatët e tjerë kanë vendosur sanksione të ashpra ndaj Moskës për të dobësuar ekonominë dhe për ta bërë më të vështirë për vendin që të sigurojë furnizime për luftën.
