Praga akuzon Kinën për hakerimin e Ministrisë së Jashtme Çeke

Qeveria çeke të mërkurën dënoi Kinën për kryerjen e një sulmi kibernetik kundër ministrisë së saj të jashtme, i cili zbuloi mijëra email-e të paklasifikuara.
Çekia tha se grupi i sponsorizuar nga shteti kinez, Advanced Persistent Threat 31 (APT31), kishte në shënjestër ministrinë e jashtme që nga viti 2022 – viti kur vendi mbante presidencën e radhës të BE-së – dhe ishte në gjendje të lexonte email-e të paklasifikuara të dërguara midis ambasadave dhe institucioneve të BE-së.
Ministri i jashtëm çek, Jan Lipavský, tha se do ta thërriste menjëherë ambasadorin kinez për të shpjeguar gjetjet dhe për t’i thënë se kjo do të dëmtonte marrëdhëniet dypalëshe të vendeve.

“Me veprimin e sotëm, ne e kemi ekspozuar Kinën, e cila ka punuar prej kohësh për të minuar qëndrueshmërinë dhe demokracinë tonë”, tha Lipavský. “Përmes sulmeve kibernetike, manipulimit të informacionit dhe propagandës, ajo ndërhyn në shoqërinë tonë – dhe ne duhet të mbrohemi kundër kësaj.”

Është hera e parë që qeveria çeke ia atribuon një sulm kibernetik kombëtar një aktori të mbështetur nga shteti.

Një hetim i kryer nga Shërbimi i Informacionit të Sigurisë, Inteligjenca Ushtarake, Zyra për Marrëdhënie me Jashtë dhe Informacion, dhe Agjencia Kombëtare e Sigurisë Kibernetike dhe të Informacionit (NUKIB) u dha autoriteteve çeke një shkallë të lartë sigurie se kush ishte pas shënjestrimit të ministrisë.

APT31 drejtohet nga ministria e sigurisë shtetërore e Kinës nga qyteti i Wuhan, sipas departamentit të drejtësisë të SHBA-së.
Grupi është akuzuar për sulme të profilit të lartë në të kaluarën, duke përfshirë shënjestrimin e emaileve personale të stafit të fushatës që punonte për kandidatin presidencial të SHBA-së Joe Biden në vitin 2020. Në vitin 2024, Mbretëria e Bashkuar dhe SHBA-ja vendosën sanksione ndaj individëve të lidhur me APT31. Hakimi i dyshuar kinez shkaktoi zemërim në Bruksel, midis zyrtarëve të lartë të BE-së dhe në selinë e NATO-s.

“Bashkimi Evropian dhe Shtetet e tij Anëtare, së bashku me partnerët ndërkombëtarë, qëndrojnë në solidaritet me Çekinë në lidhje me fushatën keqdashëse kibernetike që synonte Ministrinë e saj të Punëve të Jashtme”, tha në një deklaratë diplomatja më e lartë e BE-së, Kaja Kallas.
“U bëjmë thirrje të gjitha shteteve, përfshirë Kinën, të përmbahen nga një sjellje e tillë, të respektojnë ligjin ndërkombëtar dhe t’i përmbahen normave dhe parimeve të OKB-së, duke përfshirë ato që lidhen me infrastrukturën kritike”, shtoi Kallas.
“Aktorët e kërcënimit kibernetik kërkojnë vazhdimisht të destabilizojnë Aleancën. Ne mbetemi të përkushtuar për të ekspozuar dhe kundërshtuar kërcënimin e konsiderueshëm, të vazhdueshëm dhe në rritje kibernetik, duke përfshirë sistemet tona demokratike dhe infrastrukturën kritike. Jemi të vendosur të përmirësojmë më tej aftësitë dhe qëndrueshmërinë tonë dhe të përdorim aftësitë e nevojshme për të penguar, mbrojtur dhe kundërshtuar spektrin e plotë të kërcënimeve kibernetike për të mbështetur njëri-tjetrin”, tha aleanca ushtarake e NATO-s në një deklaratë të mërkurën./ Politico