Petkov në një vizitë zyrtare në Maqedoninë e Veriut për të përmirësuar marrëdhëniet e tensionuara
Kryeministri i sapoemëruar bullgar, Kiril Petkov deklaroi sot se, do të udhëtojë në Maqedoninë e Veriut këtë muaj në një përpjekje për të përmirësuar marrëdhëniet e tensionuara midis dy vendeve.
Për më shumë se një vit, Bullgaria ka penguar fillimin e bisedimeve për anëtarësimin e Maqedonisë së Veriut në Bashkimin Evropian, me arsyetimin se një Traktat i Miqësisë i vitit 2017 nuk është respektuar nga qeveria në Shkup.
Petkov synon të takohet me Dimitar Kovaçevskin më 18 janar, dy ditë pasi Kovaçevski do të betohet si kryeministër i Maqedonisë së Veriut.
Petkov tha sot gjatë një seance parlamentare se, marrëdhëniet e fqinjësisë së mirë me Maqedoninë e Veriut mbeten parimi kryesor, ndërsa shtoi se qëndrimet e Bullgarisë ndaj fqinjit të saj mbeten të pandryshuara.
Pesë grupe pune do të formohen për të përmirësuar marrëdhëniet në fusha të ndryshme, përfshirë infrastrukturën.
Bullgaria akuzon Maqedoninë e Veriut për falsifikimin e historisë dhe kulturës bullgare dhe për mbështetjen e gjuhës së urrejtjes kundër Bullgarisë.
Eunews.al
