Negociatat mbi Ukrainën mbahen në Riad. I dërguari i Trump: BE s’është në tryezë
Bisedimet e paqes midis Rusisë dhe Ukrainës janë gati të hyjnë në kulmin e tyre. Sipas Politico, disa përfaqësues të qeverisë amerikane po shkojnë drejt Riadit të Arabisë Saudite për të nisur zyrtarisht negociatat. Ata janë Mike Waltz, Këshilltar për Sigurinë Kombëtare, Marco Rubio, Sekretar i Shtetit dhe Steve Witkoff, i dërguari special për Lindjen e Mesme. Sipas Politico, Keith Kellogg, i dërguari special i Donald Trump për bisedimet Ukrainë-Rusi, nuk do të jetë i pranishëm në takim dhe as përfaqësues të fuqive të tjera të mëdha evropiane.
Kellogg: “BE nuk do të jetë në bisedimet e paqes”
Politico konfirmon nga burime të saj, frikën më të madhe të Evropës: atë të përjashtimit nga negociatat e paqes midis Rusisë dhe Ukrainës. Për më tepër, ishte vetë Keith Kellogg që sqaroi atë ditë se Kontinenti i Vjetër do të ketë një rol margjinal në bisedimet për t’i dhënë fund konfliktit. Evropa, tha i dërguari special i Trump për Ukrainën, do të konsultohet, por nuk do të ulet në tryezën e bisedimeve. “Mund të jetë si shkumës në një dërrasë të zezë, mund të jetë pak irrituese, por jam shumë i sinqertë”, tha Kellogg në konferencën e sigurisë në Mynih. “Miqve të mi europianë u them: hyni në debat, jo duke u ankuar nëse mund të jeni apo jo në tavolinë, por duke propozuar ide, duke rritur shpenzimet.”
Kërkesa për informacion nga Uashingtoni
Me pak fjalë, Evropa nuk po prek topin në negociata, të paktën në këtë fazë fillestare. Megjithatë, për të çuar përpara negociatat, Uashingtoni është në kontakt të vazhdueshëm me Brukselin. Financial Times raporton se Departamenti Amerikan i Shtetit u ka kërkuar qeverive evropiane të japin informacion të detajuar mbi armët, trupat paqeruajtëse dhe masat e sigurisë që mund t’i japin Ukrainës si pjesë e çdo garancie sigurie për t’i dhënë fund luftës me Rusinë. Kërkesa thuhet se është dërguar këtë javë dhe ka për qëllim përcaktimin e vullnetit aktual të Evropës për të mbrojtur Ukrainën pas një marrëveshjeje paqeje, por gjithashtu – shkruan Financial Times – çmimin që Europa është e gatshme të paguajë për të marrë pjesë në negociata. Të hënën, më 17 shkurt, liderët evropianë mund të mblidhen për një samit të jashtëzakonshëm në Paris për të diskutuar rolin e Evropës në bisedimet midis Moskës dhe Kievit. Samiti, megjithatë, ende nuk është konfirmuar.
Lavrov dhe Rubio
Përpara samitit në Riad, ministri i jashtëm rus Sergei Lavrov dhe sekretari amerikan i shtetit Marco Rubio patën një bisedë telefonike në të cilën ranë dakord “për gatishmërinë e tyre për të punuar së bashku për të rivendosur një dialog të respektueshëm reciprok në përputhje me tonin e vendosur nga presidentët” Trump dhe Putin. Gjatë bisedës telefonike, Kremlini tha se “vendosmëria e ndërsjellë për të bashkëvepruar në çështjet kryesore ndërkombëtare, duke përfshirë marrëveshjen për Ukrainën dhe situatën në Palestinë, u përvijua gjithashtu”.
