Lavrov: Paqëndrueshmëria në Afganistan mund të përhapet në vendet fqinje
Ministri i Jashtëm, rus Sergei Lavrov ngriti alarmin mbi situatën në Afganistan duke thënë se paqëndrueshmëria në rritje atje mund të përhapet në vendet fqinje.
“Situata në Afganistan është përkeqësuar me shpejtësi si rezultat i tërheqjes së trupave të SHBA-së dhe NATO-s”, tha Lavrov në një konferencë mbi Azinë Qendrore dhe Jugore në kryeqytetin e Uzbekistanit, Tashkent.
“Kriza afgane po përkeqëson kërcënimin terrorist dhe problemin e trafikut të paligjshëm të drogës, i cili ka arritur një nivel të paparë. Ka rreziqe reale të përhapjes së paqëndrueshmërisë në shtetet fqinje”, paralajmëroi ai.
“Kërcënimi i një skenari të tillë është pengesë serioze për përfshirjen e Afganistanit në bashkëpunimin rajonal dhe zbatimin e projekteve të transportit, logjistikës dhe energjisë, pasi lidhja e Azisë Qendrore dhe Jugore është e mundur vetëm nëse ka siguri në terren”, tha Lavrov.
Ai u bëri thirrje të gjitha vendeve të rajonit si dhe lojtarëve globalë që të bëjnë më shumë përpjekje drejt arritjes së një paqeje gjithëpërfshirëse dhe të qëndrueshme në Afganistan.
“Ne jemi gati për bashkëpunimin më të gjerë të mundshëm ndërkombëtar në të gjitha aspektet e zgjidhjes afgane”, tha ai.
Deklaratat e Lavrovit vijnë në fazat e fundit të tërheqjes së SHBA-së nga vendi i shkatërruar nga lufta, duke i dhënë fund pranisë 20-vjeçare, dhe midis një rritjeje alarmante të dhunës, me shumë rrethe të marra nga talebanët.
Eunews.al
