Kosova do të vazhdojë me vettingun gjyqësor pavarësisht kundërshtimit të BE-së

Qeveria e Kosovës planifikon të verifikojë të gjithë gjyqtarët dhe prokurorët e vendit pavarësisht kundërshtimeve të Bashkimit Evropian.

Në një intervistë për Euronews Albania, ministrja e Drejtësisë së Kosovës, Albulena Haxhiu, konfirmoi se qeveria e Kurtit e konsideron të domosdoshme reformën në drejtësi.

Në shtator të vitit të kaluar, kryeministrit Kurti iu paraqit propozimi i parë për vettingun gjyqësor, i cili parashikonte ngritjen e institucioneve dhe paneleve të reja për verifikimin e njerëzve në gjyqësor.

Megjithatë, në tetor, BE dekurajoi Kosovën dhe Maqedoninë e Veriut që të ndiqnin reforma të ngjashme në sistemet e tyre të drejtësisë si ajo që ka mbështetur dhe vazhdon të mbështesë në Shqipëri.

Pas një paneli mbi reformën në drejtësi të mbajtur në Tiranë, ministrat e drejtësisë të të dy vendeve thanë se zyrtarët evropianë kundërshtuan planet e tyre për të verifikuar të gjithë gjyqtarët dhe prokurorët duke përdorur formatin e përdorur në Shqipëri.

Zyrtarët e BE-së pohuan se reforma të tilla mund të çojnë në shumë shkarkime dhe gjykata dhe prokurori jofunksionale, siç ishte rasti në Shqipëri ku, për më shumë se dy vjet, dy gjykatat më të larta ishin jofunksionale.

Në atë kohë, Haxhiu theksoi “raportin alarmant” të shkarkimeve në Shqipëri, por vuri në dukje se Kosova ka marrë mësimet e nevojshme nga reformat atje. Procesi i verifikimit është në gjysmë të rrugës dhe gjysma e të gjithë stafit gjyqësor të verifikuar ose janë larguar ose janë shkarkuar.

Edhe institucionet e drejtësisë së Kosovës janë kundër vendimit të qeverisë për verifikimin e gjyqtarëve dhe prokurorëve. Në nëntor, Këshilli Gjyqësor dhe Prokurorial i Kosovës bojkotuan takimin e përbashkët me qeverinë për të hartuar legjislacionin për këtë çështje.

Pavarësisht reagimeve nga institucionet e drejtësisë dhe skepticizmit të BE-së, Kurti dhe qeveria e tij kanë përsëritur se do të avancojnë reformën dhe do ta paraqesin atë në parlament, për të pastruar sistemin nga gjyqtarët dhe prokurorët e korruptuar dhe për të përmirësuar administrimin e drejtësisë.