Simion pretendon se Franca ndërhyri në zgjedhjet presidenciale në Rumani
Lideri i së djathtës ekstreme rumune, George Simion, njoftoi të martën se do të kontestojë humbjen e tij në zgjedhjet presidenciale të së dielës së kaluar, duke pretenduar ndërhyrje të huaja.
Kryebashkiaku i qendrës i Bukureshtit, Nicuşor Dan, fitoi raundin e dytë të votimit, i cili u ripërsërit pasi zgjedhjet e para të nëntorit të kaluar u anuluan për shkak të shqetësimeve rreth ndërhyrjes ruse.
“Ne do t’i kontestojmë zgjedhjet në Gjykatën Kushtetuese për të njëjtat arsye për të cilat anuluan zgjedhjet në dhjetor”, tha Simion, duke përmendur “ndikimin e jashtëm dhe kompromisin institucional”.
“Tani kemi prova të pakundërshtueshme të ndërhyrjes nga Franca, Moldavia dhe aktorë të tjerë, në një përpjekje të orkestruar për të manipuluar institucionet, për të drejtuar narrativat mediatike dhe në fund të fundit për të imponuar një rezultat që nuk pasqyron vullnetin sovran të popullit rumun.”
Ultranacionalisti tha se 100 milionë euro u shpenzuan në Moldavi për të blerë vota dhe pretendoi se “njerëz të vdekur” votuan në raundin e dytë të së dielës.
Ai iu referua pretendimeve të Pavel Durov, themeluesit të aplikacionit të mesazheve Telegram, se qeveria franceze i kërkoi platformës të “heshtë” zërat konservatorë përpara zgjedhjeve presidenciale.
Simion i bëri thirrje gjykatës të ftojë Durovin të dëshmojë dhe “të ndajë nga afër atë që di për dezinformimin dhe operacionet dixhitale që ndërhynë në zgjedhjet e Rumanisë” para se rezultati të validohet.
“As Franca, as Moldavia dhe askush tjetër nuk ka të drejtë të ndërhyjë në zgjedhjet e një shteti tjetër”, shkroi Simion në një postim.
Simion tha se kishte pritshmëri të ulëta se gjykata e lartë e Rumanisë do të anulonte zgjedhjet pas ankesës së tij dhe u bëri thirrje rumunëve të paraqisnin gjithashtu ankesa./Politico
