Gjermania: Ukraina i plotëson kushtet për bisedimet e pranimit në BE

 Qeveria gjermane ka thënë se Ukraina ka përmbushur kërkesat e reformave të nevojshme për të filluar diskutimet për anëtarësimin në Bashkimin Evropian.

”Sipas qeverisë gjermane, Ukraina plotëson të gjitha kërkesat për të qenë në gjendje të hapë negociatat e anëtarësimit në BE në qershor”, deklaroi ministrja gjermane për Evropën, Anna Luhrmann.

”Prandaj ne u bëjmë thirrje të gjitha vendeve anëtare që të bien dakord shpejt për kuadrin e negociatave”, theksoi deputetja e të gjelbërve gjermanë.

Në dhjetor, krerët e BE-së ranë dakord të hapin negociatat e pranimit me Ukrainën dhe riafirmuan angazhimin e tyre për të vazhduar të ofrojnë mbështetje të fortë për vendin dhe popullin e tij për aq kohë sa të jetë e nevojshme.

Megjithatë, raporti i fundit i Komisionit zbuloi se Ukraina nuk arrin të zbatojë disa reforma, veçanërisht në luftën kundër korrupsionit dhe mbrojtjen e pakicave, gjë që çoi në marrëveshjen se të gjitha kërkesat e reformës duhet të përmbushen përpara se të fillojnë negociatat.

Ambasadorët e BE planifikojnë të takohen javën e ardhshme për të diskutuar një kornizë të mundshme negociuese.

Hungaria shihet si një pengesë e mundshme.

Ukraina, së bashku me Moldavinë fqinje, kishin kërkuar t’i bashkoheshin bllokut në fillim të vitit 2022 pas pushtimit në shkallë të plotë të Rusisë.