Gjermania do t’i dërgojë Ukrainës 1.000 raketa antitank dhe 500 raketa Stinger
Gjermania ka vendosur t’i dërgojë Ukrainës 1.000 raketa antitank dhe 500 raketa Stinger nga stoqet e ushtrisë gjermane.
Zëdhënësi i qeverisë, Steffen Hebestreit, në një deklaratë me shkrim njoftoi se qeveria gjermane ka vendosur sot të dërgojë 1.000 raketa antitank dhe 500 raketa Stinger nga stoqet e ushtrisë gjermane për të mbështetur Forcat e Armatosura të Ukrainës. “Armët do t’i dorëzohen Ukrainës në kohën më të shpejtë”, shtoi Hebestreit.
Kryeministri Olaf Scholz, vlerësimi i të cilit është përfshirë në deklaratë, ka vënë në dukje se sulmi i Rusisë ndaj Ukrainës është një pikë kthese. Ai ka ndarë mendimin e tij se “Kjo kërcënon rendin tonë të pasluftës. Në këtë situatë është detyrë që të mbështesim me sa mundemi që Ukraina të mbrojë veten e saj kundër ushtrisë pushtuese të Vladimir Putinit (presidenti i Rusisë). Gjermania është pranë Ukrainës”.
Dërgimi i armëve nga qeveria në Ukrainë, nënkupton ndryshimin e politikave në politikën e vendit. Gjermania refuzonte dërgimin e armëve në rajonet e luftës dhe krizës.
