Dhjetëra liderë evropianë takohen në Moldavi për Ukrainën
Afro 50 liderë evropianë do të takohen sot në Bulboaka, Moldavi, rreth 20 kilometra larg kufirit ukrainas, për të diskutuar çështjet e sigurisë dhe energjisë së kontinentit.
Takimi, në të cilin Rusia dhe Bjellorusia nuk janë ftuar, vijon iniciativën e vitit të kaluar të udhëhequr nga Franca për të mbledhur liderët e Bashkimit Evropian dhe vendeve joanëtare në Pragë për të diskutuar sfidat aktuale politike.
Liderët pritet të debatojnë për temat kryesore në grupe më të mëdha, por edhe të kenë mundësinë të flasin për çështje të tjera privatisht ose në grupe më të vogla, pa kufizimet dhe pompozitetin e vizitave shtetërore dhe protokolleve të tyre.
Udhëheqësit e Armenisë dhe Azerbajxhanit, të cilët u takuan në Pragë disa javë pas një sulmi nga Azerbajxhani që la më shumë se 200 të vdekur nga të dyja palët, në një konflikt të gjatë dekadash mbi kontrollin e territorit të Nagorni-Karabahut, përjetuan vitin e kaluar një sukses diplomatik gjatë samitit.
Udhëheqësit e dy ish-republikave sovjetike pritet të takohen me kancelarin gjerman Olaf Scholz dhe presidentin francez Emmanuel Macron në Moldavi për të avancuar më tej përpjekjet për paqe.
Vendndodhja e samitit është shumë simbolike pasi fshati Bulboaka është në afërsi të kufirit me Ukrainën e shkatërruar nga lufta dhe rajonin separatist të Moldavisë, Transdnistria, ku ushtarët rusë janë vendosur që nga vitet 1990.
Ndërkohë, edhe presidenti ukrainas Volodymyr Zelensky mbërriti në Moldavi për samitin e liderëve evropianë.
