BE: Mbizotërojnë shqetësime për shtetin e së drejtës në Hungari
Komisioni Evropian ka theksuar edhe një herë mangësitë serioze në shtetin e së drejtës në Hungari, në një raport të publikuar sot.
Vlerësimi vjetor në të gjithë BE-në, vëren se ka pak progres në disa fusha thelbësore, duke përfshirë mbrojtjen e shoqërisë civile, pavarësinë e gjyqësorit dhe luftën kundër korrupsionit.
Nga tetë rekomandimet e vitit të kaluar, Budapesti ka treguar përmirësime të dukshme vetëm në një fushë – shpërblimin e gjyqtarëve, prokurorëve dhe stafit gjyqësor.
“Ka ende shumë punë për të bërë në Hungari”, u tha gazetarëve në Bruksel zëvendëspresidentja e Komisionit Evropian, Henna Virkkunen.
Raporti i “Shtetit të së Drejtës” kritikon gjithashtu mungesën e progresit në ndjekjen penale të korrupsionit të nivelit të lartë në Hungari.
“Numri i dënimeve është në rënie, vendimet nga prokurorët publikë nuk shqyrtohen mjaftueshëm dhe reformat e rëndësishme, siç janë rregullat e reja të lobimit, ende nuk janë materializuar”, thuhet në raport.
Situata e vështirë për median e pavarur mbetet gjithashtu e tensionuar për shkak të shpërndarjes selektive të informacionit dhe hetimeve kundër gazetarëve nga autoritetet hungareze.
Në vendet e tjera të BE-së, mungesa e transparencës në procedurat legjislative, sulmet ndaj medias së pavarur ose mangësitë në financimin e partive janë çështje të përsëritura.
