Banka Botërore miraton huanë 120 mln USD për zhvillimin ekonomik të Shqipërisë,ndihmë për avancimin në integrimin në BE
Shqipëria duhet të përgatitet për anëtarësimin në BE, dhe zhvillimi ekonomik, menaxhimi fiskal dhe rritja e të ardhurave duhet të jenë të qëndrueshme dhe të sigurta. Për këto objektiva Shqipëria do të ketë edhe mbështetjen e Bankës Botërore, e cila ka miratuar një hua të re 120 milionë dollarë, që ndihmon vendin të përmirësojë qëndrueshmërinë fiskale dhe atë mjedisore. Në njoftimin e Bankës Botërore thuhet se kjo linjë e re financimi do të mbështesë Shqipërinë në tri fusha kryesore reformash.
Së pari do të jetë në fokus forcimi i hapësirave fiskale, kjo për shkak të përjashtimeve të shumta tatimore që vendi ka për sektorë të ndryshëm. Për këtë arsye do të punohet për përmirësimin e administrimit të taksave si dhe raportimit të ndërmarrjeve shtetërore mbi rreziqet e mundshme sociale dhe mjedisore. Fusha e dytë ka të bëjë me energjinë, ku mbështetja do të përqendrohet tek nxitja e burimeve të rinovueshme dhe rritjen e efiçencës së energjisë.
ProfitSence Logo
Dhe së treti është mbrojtja e mjedisit dhe ulja e emetimeve të karbonit. “Paketa e reformave që mbështesim përmes këtij programi synon të forcojë perspektivat e zhvillimit të Shqipërisë. Ky financim do ta ndihmojë vendin të adresojë sfidat kryesore në sektorin e energjisë si dhe të rrisë aftësinë e qeverisë për të menaxhuar rreziqet fiskale dhe për të mbështetur më mirë shtresat në nevojë të popullsisë”, tha Richard Record, Menaxheri në detyrë i Bankës Botërore për Shqipërinë. Banka Botërore vlerëson se ekonomia e Shqipërisë po rritet, borxhi publik është në rënie ndërsa politika monetare mbetet e qëndrueshme.
